MTENDA RICE CARE YATOA MILIONI 4.2 KUJENGA GHALA KWA WAKULIMA WA MPUNGA.

Habari na Ezekiel Kamanga,Mbeya.

Kampuni ya Mtenda Rice Care ya Mkoani Mbeya imetoa shilingi milioni nne na laki mbili,kwa vikundi vya wakulima wa zao la mpunga kwa lengo la kujenga ghala katika Kata ya Msangano,Taraya ya Msangano,Wilaya ya Momba Mkoani Mbeya.

Mkurugenzi mtendaji wa Kampuni hiyo Bwna Geofrey Mtenda,amekabidhi msaada huo kwa Mwenyekiti Bwana Matani Mwamlima kwa niaba ya wakulima wa kata hiyo.

Vijiji vitakavyonufaika na ghala hilo ni pamoja na Kijiji cha Msangano,Ntinga,Mnyuzi,Chindi na Ipata ambavyo vitatumia ghala hilo kuhifadhia mpunga katika msimu wa mavuno kutokana na kutokuwa na ghala la kuhifadhia zao hilo.

Akisoma risala mbele ya Mkurugenzi huyo mwakilishi wa watumishi wanaolinda mpunga wilayani humo,Bwana Juma Sichilima amesema wanaishukuru kampuni hiyo kwa kuwapa pia mbegu bora,zilizotoa chachu ya ongezeko la kiwango cha mavuno kwa mwaka huu,licha ya mvua kutonyesha vema katika msimu huu.

Kwa upande wake mshauri wa Kampuni hiyo Bwana Emile Malinza,amesema kuwa nia ya kampuni ya Mtenda ni kuhimiza wakulima kuwa na utaratibu wa uuzaji wwa takabadhi ya ghalani kwani hiyo ndio njia pekee ya kumkomboa mkulima.

Ameenda mbali zaidi kwa kusema kuwa kampuni hiyo inanunua mpunga kwa bei nzuri na pia kwa kutumia vipimo sahihi(mizani),kutokana na walanguzi hupima mpunga kwa kutumia debe ambapo mkulima hupunjwa na kujikuta anakuwa mtumwa wa wafanyabiashara.

Mkutano huo ulijumuisha zaidi ya wakulima 30 ulifanyika Juni 18 mwaka huu katika Ukumbi wa Mtenda Sunset uliopo Mtaa wa Soweto,Jijini Mbeya.

Hata hivyo baada ya mkutano huo wakulima hao walitembelea kiwanda cha kukobolea Mpunga cha Wella kilichopo eneo la Iyunga jijini humo na wakulima kujifunza ukoboaji wa mpunga kutokana na msongamano hivyo kupata ubora katika Soko la kitaifa na kimataifa.