MAKUNDI YAENDELEA KUIMALIZA CHADEMA MKOANI MBEYA.

Habari na Angelica Sullusi, Mbeya.

Makundi  ya Uchaguzi  mkuu wa Chama Cha Demokrasia na Maendeleo (CHADEMA) ngazi ya Taifa wa mwaka 2009 yamedaiwa kukivuruga chama hicho Mkoani Mbeya na kusababisha baadhi ya viongozi kujiuzulu.

Wakizungumza na waandishi wa habari baadhi ya viongozi na Wanachama wa Chadema Mkoani hapa wamesema kuwa hali ya chama hicho mkoani hapa kwa sasa siyo nzuri hivyo kusababisha baadhi ya viongozi kukata tamaa kuendelea na nyazifa zao za uongozi.

Mmoja wa Viongozi waanzilishi wa chama hicho Mkoani hapa George Mtasha amesema kuwa mchakato wa kuwaondoa madarakani viongozi wanaodaiwa kumuunga mkono Zitto kipindi kile cha mchakato wa uchaguzi 2009 umeanza Januari 11, mwaka hu katika mkutano wa baraza la Mashauriano la Mkoa uliofanyika katika ukumbi wa hotel ya Mount Livingstone Jijini hapa.

 Mtasha amesema kuwa  katika kikao hicho kilichoongozwa na Dk. Wilbroad Slaa, uongozi Mkoa uliagizwa kufanya kama alivyofanya yeye  baada ya kuvunja uongozi wa Mkoa uliokuwepo kwa madai ya  kusafisha chama.

Amesema kuwa baada ya kubaini kuwa  kuna mizengwe inayofanywa kwa lengo la kuwaondoa madarakani baadhi ya watu ndipo alipoamua kujihudhuru February  10,2012 wadhifa huo.

Kwa upande wake aliyekuwa Katibu  wa Chadema Mkoa wa Mbeya Eddo Makatta amesema kuwa kuondolewa kwake katika wadhifa ni kutokana na kile kilichodaiwa kuwa  yupo upande wa Zitto.

Aidha, viongozi hao wamesema kuwa pamoja na kuwepo kwa makundi hayo bado wataendelea kukililia chama chao kwa kuhakikisha kinashika dola kwa kuwa wanachama na wakereketwa wa chama hicho.

WASHINDWA KUENDELEA NA MASOMO KUTOKANA NA UKOSEFU WA VYUMBA VYA MADARASA - MBEYA.

Habari na Angelica Sullusi, Mbeya.

Hatimaye wanafunzi waliofaulu kujiunga kidato cha kwanza mwaka huu na kuchelewa kuanza masomo yao kwa kukosa vyumba vya madarasa katika shule ya sekondari Mbarali, Kata ya Ubaruku Wilayani hapa wanatarajia kuanza masomo yao mwisho wa mwezi huu baada ya vyumba hivyo kukamilika.

Akizungumza na  mwandishi wetu, Afisa Mtendaji wa kata hiyo, Mikidadi Mwazembe amesema kuwa vyumba hivyo vipatavyo tisa vinatarajiwa kukamilika mwishoni mwa mwezi huu.

Mwazembe amesema kuwa mafanikio ya ujenzi wa vyumba hivyo yanatokana na jitihada za makusudi za serikali,mfuko wa jimbo na uhamasishaji wa wananchi katika kuchangia ujenzi huo.

Amesema kuwa katika ujenzi huo wamewatumia mafundi wa kawaida ndani ya kata hiyo kwa lengo la kuwawezesha kupata fedha za kujikimu na maisha,lakini ujenzi huo ukiwa chini ya usimamizi wa wahandisi wa ujenzi wa wilaya hiyo ambapo ujenzi huo unatarajia kughalimu kiasi cha shilingi milioni 75.

Mbali na jitihada hizo,Mwazembe amesema mpaka sasa wana mikakati ya kujenga shule nyingine mpya ya sekondari kuanzia mwezi juni mwaka huu,hivyo kuipongeza Kamati ya Maendeleo ya Kata(WODC),chini ya Diwani wa kata hiyo na wananchi kwa ujumla.

Aidha, ameiomba serikali kwenda na kasi ya kuongeza walimu zaidi ili kukidhi  matarajio ya wananchi ambao wamekuwa mstali wa mbele katika uchangiaji wa ujenzi wa vyumba vya madarasa na majengo ya shule mbalimbali za sekondari.

Kwa upande wake Mkuu wa Wilaya hiyo Kanali Cosmas Kayombo, amepongeza jitihada za makusudi zilizofikiwa na uongozi huo katika kufanikisha ukamilikaji wa ujenzi huo wa madarasa ambao umechangiwa kwa kiasi kikubwa na nguvu ya wananchi.

ALIYEPOPOA GARI LA MSAFARA WA WAZIRI WA MAMBO YA NDANI NCHINI TANZANIA MH. SHAMSI VUA NAHODHA APANDISHWA KIZIMBANI NA KUSOMEWA SHTAKA - MBEYA.

 

Waziri wa Mambo ya ndani wa Jamhuri ya Muungano wa Tanzania, Mheshimiwa Shamsi Vuai Nahodha, akizungumza na vyombo vya habari Jijini Dar es salaam. 

*****

Habari na Ezekiel Kamanga, Mbeya.

Mkazi wa Kijiji cha Nelo Kiloleni mji mdogo wa Tunduma Mkoani Mbeya, Aludo Juma Sanga (28) amefikishwa mahakama ya Wilaya ya Mbozi mbele ya Hakimu mfawidhi mwandamizi, Rahim Mushi kwa kosa la kutishia na kumdhuru Waziri wa mambo ya ndani Mheshimiwa Shamsi Vuai Nahodha.

Mwendesha mashtaka Bwana John Mazwile ameiambia mahakama hiyo kuwa mtuhumiwa alitenda kosa hilo wakati Waziri Nahodha akiwa ndani ya gari yenye namba WMN alipokuwa katika ziara,  Februari 3 mwaka huu, majira ya saa 3 na dakika 50 asubuhi maeneo ya Mwangaza Hotel Tunduma.

Amesema kosa hilo ni kinyume cha sheria kifungu cha 89 (a) na (b), cha marekebisho ya sheria mwaka 2002 cha kanuni ya adhabu ambapo mtuhumiwa alikuwa na kipande cha mti na bendera ya Chama cha Demokrasia na Maendeleo (CHADEMA).

 Ameongeza kuwa mshtakiwa alizuiwa na Vijana wa ulinzi wa Chama Cha Mapinduzi (CCM), maarufu kama Green Gurd ambapo alifikishwa mahakamani hapo kwa mara ya kwanza Februari 6 mwaka huu.

Aidha PP Mazwile ameiambia mahakama upelelezi wa shauri hilo umekamilika na kwamba upande wa mashtaka unatarajia kuleta mashaidi wanne kwa ajili ya kutoa ushahidi na kwamba vielelezo vipo ambavyo ni kipande cha mti na bendera ya CHADEMA vilivyotumiwa na mshtakiwa huyo.

Hata hivyo kesi hiyo imeahirishwa mpaka itajapotajwa tena mwenzi April 4 mwaka huu.

Wakati huohuo Victor Mwasongole na Joyce Tenson Mwampashi wamesomewa shtaka la mauaji ambapo imedaiwa na mahakamani hapo washtakiwa kwa pamoja walimuua Dominick Richard, eneo la Ichenjezya wilaya ya Mbozi mkoani hapa.

Kosa hilo limetajwa kuwa ni kinyume cha sheria kifungu cha 196 (a) na (b) sura ya 16 cha marekebisho ya sheria ya mwaka 2002.

Katika kosa hilo watuhumiwa hawakutakiwa kujibu lolote kwa kuwa mahakama hiyo haina uwezo wa kusikiliza na keshi hiyo itatajwa April 10 mwaka huu.

WATU 7 WAFIKISHWA MAHAKAMANI KUSOMEWA MASHTAKA YANAYOWAKABILI - MBEYA.

Habari na Ezekiel Kamanga, Mbeya.

Watu saba wamefikishwa katika Mahakama ya Wilaya ya Mbozi, mbele ya Hakimu mfawidhi mwandamizi Rahimu Mushi kwa tuhuma za makosa 27 yanayowakabili, yakiwemo ya ubakaji , wizi, kutumia silaha na kuharibu mali.

Akiwasomea mashitaka yao Mkaguzi wa Polisi(PP) John Mwanzile makosa hayo yalifanyika Machi 11 hadi 15 mwaka huu, katika Kijiji cha Chilulumo wilayani humo kufuati vurugu za vyama vya siasa CCM na CHADEMA.

Amewataja watuhumiwa hao kuwa ni pamoja na Yuda Paulo Siwiti (28), Agnasio Simchimba (37), Ivod Raphael Sichalwe (23), Danford Elias Simfukwe (22), Ally Simbeye (34), Happymax Simwaka (38) na Raymond Boniface (30).

Watuhumiwa hao wanakabiliwa na makosa hayo katika kesi namba 48, kupitia vifungu 296(i) a na b, 326(i) sura ya 16 marekebisho ya sheria mwaka 2012.

Mwendesha mashtaka hayo amesema pia watuhumiwa wametenda makosa katika vifungu vya 225, 297(a), 131(a)(i) na (ii), ambapo watuhumiwa wote walikana makosa hayo.

Aidha Yuda Paulo Siwiti, Happymax Simwaka na Raymond Boniface wote kwa pamoja wanakabiliwa na kosa la kubaka kwa kundi kinyume cha sheria cha kanuni ya adhabu, kifungu cha 131(a)(i) na (ii) cha mwaka 2002, watuhumiwa hao waliwabaka mabiti wawili wenye umri wa miaka 15 na mmoja mwenye umri wa miaka 20, bila ridhaa mnamo Machi 12 mwaka huu majira ya usiku wa saa 3:00 hadi saa 3:20.

Washtakiwa hao walikana kutenda kosa hilo na kunyimwa dhamana,  ambapo kesi hiyo itatanjwa tena April 3 mwaka huu.

Hata hivyo waliobakwa wameruhusiwa kutoka Hospitali ya Wilaya ya Mbozi na kurejea baada ya vipimo na matibabu, baada ya kulazwa katika hospitali hiyo Machi 18 kutokana na kupata matibabu hafifu katika Zahanati ya Chilulumo.

Wakati huohuo Mwenyekiti wa CHADEMA Kata ya Chilulumo Adomali Leonard Nakambale (38), amefikishwa katika mahakama hiyo kwa makosa mawili yanayomkabili.

Mwendesha mashtaka Mazwile amesema tukio la kwanza ni kuvunja na kuiba mnamo Februari 29 mwaka huu, majira ya usiku.

Mwenyekiti huyo alivunja Ofisi ya Shule ya Msingi Chilulumo na kisha kuiba boksi moja la chaki, boksi la marker pen, vitabu viwili vya Atlasi, begi 20 chaki, Rim moja ya karatasi  vyote vikiwa na thamani ya shilingi 170,000/=.

Mwendesha mashtaka amesema kuwa kosa hilo ni kinyume cha sheria kifungu cha 96 a na b, sura ya 16 ya marekebisho ya sheria mwaka 2002 na mshtakiwa alikana kutenda kosa ambapo alidhaminiwa kwa dhamana ya maandishi ya shilingi laki 5.

Shtaka la pili linalomkabili Mwenyekiti huyo ni kutokana na kutoroka chini ya ulinzi halali wa Afisa mtendaji wa Kijiji saa 2 kamili asubuhi Februari 29 mwaka huu, Kijiji hicho usiku, kosa hilo lipo chini ya kifungu cha 116 na 125 sura ya 15 ya mwaka 2002.

Mtuhumiwa alikana kosa lake na kudhamini wa kwa shilingi laki mbili hadi April 10 mwaka huu, hadi kesi hiyo itakapotajwa tena.

WIVU WA KIMAPENZI , MWANAMKE AFUMANIWA NA KUUAWA, MWINGINE AKATWAKATWA NA MKONO WAKE WA KUSHOTO WANYOFOLEWA NA AJALI MMOJA AFARIKI - MBEYA.

 Basi la Prince Muro namba za usajiri T 485 BQV, liliacha njia na kupinduka hali iliyopelekea kusababisha kifo cha Dausdedit Joseph (29) na abiria 14 waliokuwa wakisafiri kupitia basi hilo kutoka Dar es salaam kuelekea Tunduma kujeruhiwa Machi 19 mwaka huu majira ya saa 2:30 katika Kijiji cha Senjele Wilaya ya Mbozi .

Hivi ndivyo mwonekeno wa damu za abiria na taswira ya viti vilivyoharibika vibaya baada ya ajali hiyo iliyotokea Machi 19 mwaka huu majira ya saa 2:30 katika Kijiji cha Senjele Wilaya ya Mbozi

Hapa ndipo Basi la Prince Muro lilipotaka kuingia na kulikwepa gari hili na kupindukia upande wa pili

Muonekano wa gari hili la mizigo lenye nambari za usajiri T 664 ABB lililokuwa na tela namba T 402 AGW ambalo limeharibikia bara barani.

Mmoja wa majeruhi ambae alikuwa anatokea Dar es salaam kwenda kuwasalimu ndugu zake Ileje aliye fahamika kwa jina moja tuu la Andendekisye akiwa katika Hospital ya Ifisi Mbeya Muda huu. (Picha kwa ushirikiano wa Ezekiel Kamanga na Joseph Mwaisango).

******

Habari na Ezekiel Kamanga, Mbeya.

Watu wanne wamefariki dunia Mkoani Mbeya kwa matukio wanne tofauti tofauti, likiwemo la mwanamke kufumaniwa na kupingwa na kitu kizito kichwani hali iliyomsababishia mauti.

 Tukio la hilo limetokea katika Kijiji cha Ndaga Wilaya ya Rungwe majira ya saa nne asubuhi ambapo Sharuna Dimon (30), ambaye ni mke wa mtu aliuawa kwa kupigwa na kitu kizito kichwani, baada ya kukutwa akifanya mapenzi Yohana Mwazanga (35) ambaye ni dereva na mkazi wa kijiji hicho.

Hata hivyo Bwana Yohana amejeruhiwa vibaya baada ya kupigwa na amelazwa katika Hospitali ya Igongwe wilayani humo na watu wawili Geophrey Hezron (21) na Bahati Mussa (35) wanashikiliwa na Jeshi la Polisi .

Kamanda Nyombi amesema chanzo cha mauaji hayo kinatokana na wivu wa kimapenzi.

Ameongeza kuwa tukio la pili limetokea Machi 17 mwaka huu, katika Kijiji cha Isecho Kata ya Kwimba Wilaya ya Chunya, ambapo Flavian Otto (50) ameuawa kwa kukatwakatwa na mapanga na mtu au watu wasiofahamisha na kisha mkono wa kushoto kutokomea nao kusikojulikana.

Amesema watu hao walimvamia marehemu nyumbani kwake majira ya saa 2 usiku na chanzo cha mauaji hayo kimetajwa kuwa ni imani za kishirikina, kwani kwa mara kadhaa marehemu alikuwa akituhumiwa kujihusisha na imani hizo.

Kamanda Nyombi amesema kuwa mwili wa marehemu umehifadhiwa katika Hospitali ya Mwambani wakati upelelezi nao ukiendelea

Tukio la tatu limetokea Kitongoji cha Igumila, Kijiji cha Ishata Wilaya ya Ileje, mwananchi mmoja Jumapili Kasege (32), aliuawa kwa kukatwakatwa kichwani na kitu chenye ncha kali.

Kwa mujibu wa Kamanda Nyombi amesema marehemu alikuwa akitumikia kifungo cha nje cha miaka miwili kutokana na kesi iliyokuwa ikimkabili marehemu baada ya kutishia kuua kwa kutumia na chanzo cha kuawa kwake hakijaweza kufahamika mara moja, na upelelezi wa tukio hili unaendelea.

Aidha Machi 19 mwaka huu majira ya saa 2:30 katika Kijiji cha Senjele Wilaya ya Mbozi basi linalomilikiwa na Prince Muro lenye nambari za usajili T 485 BQV, liliacha njia na kupinduka hali iliyopelekea kusababisha kifo cha Dausdedit Joseph (29) na abiria 14 waliokuwa wakisafiri kupitia basi hilo kutoka Dar es salaam kuelekea Tunduma kujeruhiwa.

Chanzo cha ajali hiyo ni mwendokasi wa basi hilo na Lori lenye nambari za usajiri T 664 ABB lililokuwa na tela namba T 402 AGW lililokuwa limeegeshwa baada ya kuharibika na dereva wa basi na wakati akilikwepa lori na mbele kulikuwepo na lori jingine na alipojaribu kusimama basi liliacha njia na kupinduka.

WAFIKISHWA MAHAKAMANI BAADA YA KUMUIBIA MWAJIRI WAO - MBEYA.

Habari na Ezekiel Kamanga, Mbeya

Watu wawili waliokuwa wafanyakazi wa Kampuni ya Ilasi, iliyopo Wilaya ya Mbozi mkoani Mbeya, wamefikishwa mahakamani kujibu shtaka la kumuibia mwajiri wao.

Mshtakiwa wa kwanza ni Issa Jackson Msukwa na wa pili ni Matisho Wilson, ambapo kwa pamoja wanatuhumiwa kuiba starter mbili za magari aina ya Scania mali ya Lingson Chaula zenye thamani ya shilingi 2,980,000, Desemba 9 mwaka 2011 majira ya saa sita mchana.

Watuhumiwa wanadaiwa kuzifungua starter hizo katika magari yenye nambari za usajili T 265 BEN na T 191 AVL, ambapo waliyaacha katika kituo cha mafuta kinachomilikiwa na Lingson Chaula na kisha kuondoka ambapo walikamatwa Mlowo wilayani humo, wakiwa hawana starter hizo.

Kwa upande wake mlalamikaji amesema watuhumiwa awali walikiri kwamba wameiba lakini anashangaa wanapokataa mahakamani, pia wao ndio walikuwa wahusika wakubwa wa matengenezo ya magari yote.

Shahidi wa kesi hiyo Dickson Mwamlima (35) amesema anawatuhumu watu hao kwa urasimu waliokuwa wakiufanya siku hiyo na kisha wakatokomea na kukamatwa eneo la Mlowo wilayani hapo.

SAKATA LA CCM NA CHADEMA CHILULUMOWALIOBAKWA WAFIKISHWA HOSPITALI YA WILAYA YA MBOZI - MBEYA

Habari na Ezekiel Kamanga, Mbozi

Mabinti watatu waliobakwa katika vurugu zilizotokea hivi karibuni katika Kata ya Chilulumo wilaya ya Mbozi, mkoani Mbeya wamefikishwa katika Hospitali ya wilaya hiyo kwa ajili ya matibabu zaidi.

Mabinti wawili kati ya watatu wana umri wa miaka 15 kwa kila mmoja huku mmoja akiwa na umri wa miaka 20, mamefikishwa Machi 18 katika Hospitali hiyo baada ya kukutwa wamedhoofu kijijini baada ya kupatiwa huduma hafifu katika Zahanati ya Kijiji.

Hayo yamebainishwa na Mwenyekiti wa CHADEMA wilaya hiyo Bwana Joseph Mwachembe baada ya kukuta mabinti hao wapo katika hali mbaya, kutokana na kulazimishwa kubakwa na kaka zao huku wakiwa wameshikiwa mashoka na kuvuliwa nguo zote.

Hata hivyo mabinti hao wakiongea kwa majozi makubwa walisema kuwa walibakwa na vijana waliowatambua kwa majina ya Shida Claud, Joseph Simfukwe, Marius Maswezi na wengine wengi ambao hawakuwatambua, ambapo tukio lilifanyika majira ya saa mbili usiku, Februari 12 mwaka huu.

Wakati huohuo viongozi wa Serikali ya kijiji wanadaiwa kulisimamia suala hilo la ubakaji, lakini hakuna hatua zozote zilizochukuliwa dhidi yao.

CHADEMA imeweza kufungua jalada la madai dhidi ya watu waliohusika na tukio hilo kutokana na Bendera za chama hicho katika kata nzima zlishushwa na kuchomwa moto, ofisi kuvunjwa na baadhi ya mali kuchomwa moto.

Kwa upande wake Mwenyekiti wa chama hicho kimetoa kauli mbiu isemayo "Wanachilulumo haki haiombwi kwa kupiga goti, bali kwa kupiganiwa" kwa hiyo wasikate tamaa.

Kauli hiyo imekuja siku chache mara baada ya kutokea kwa vurugu hizo zilizosababisha baadhi ya wananchi kuyakimbia makazi yao kwa hofu ya kuuawa.

WATU 10 WATUHUMIWA KUCHOMA NYUMBA YA MWANAKIJIJI NA KUMTEKA MKEWE

Habari na Ezekiel Kamanga, Mbeya.

Watu 10 wakazi wa Kijiji cha Bara, Wilaya ya Mbozi Mkoani ambao baadhi yao ni viongozi wa kijiji hicho wamebomoa  nyumba na kuteketeza vitu vilivyokuwemo ndani.

Nyumba hiyo inayomilikiwa na Bwana Jumapili James Mwampamba (40), ilibomolewa Machi 14 mwaka huu majira ya saa 5 asubuhi, watu hao walikimtuhumu mwenye mali hizo kuwa kaiba mbuzi mali ya Juma Mgalla mkazi wa kijiji cha Bara Kati.

Wakati tukio hilo linatokea Bwana Jumapili alikuwa safarini ndipo walipomkosa na kisha kuchukua jukumu la kuvunja mlango na kuteketeza kila kitu kilichokuwemo ndani, vikiwemo vyakula, magodoro, madaftari ya shule, pikipiki aina ya Honda ambayo waliivunja vunja kwa kutumia mashoka.

Aidha watu hao hawakuishia hapo, ambpo walimteka nyara mke wa Bwana Jumapili aitwaye Bi. Saina Mgalla (34) ambapo waliondoka naye na haifahamiki mpaka sasa wapi alipo na katika hali isiyokuwa ya kawaida waliviteketeza kwa moto vidonge ARVs vilivyokuwa vikitumiwa na mwanamke huyo.

Hata hivyo watuhumiwa wa tukio hili ni pamoja na Mwenyekiti wa kijiji cha Bara Bwana Lingson Weja, Afisa mtendaji wa kijiji hicho Bwana Watson Maduguli, Afisa mtendaji wa Kata Bwana Martine Twinzi, Katibu wa Kitongoji Bwana Amos Jackson Mwankonde, Mwenyekiti wa Kitongoji wa Itandula Bwana Miliki Julius, Mjumbe wa Kijiji Julius Halinga, Fwanje Juma Mgalla, Ziora Biashara na Juma Mgalla.

Watuhumiwa hao mpaka sasa hawajakamatwa licha ya kufungua jalada lililofunguliwa na mtoto wa Jumapili Mwampamba anayesoma kidato cha tatu shule ya sekondari Bara yenye namba ITK/RB/30/2012, ya Machi 15 mwaka huu katika kituo cha Jeshi la Polisi Itaka.

Kamanda wa Jeshi la Polisi Advocate Nyombi amethibitisha kutokea kwa matukio hayo na kwamba anafanya uchunguzi na watuhumiwa watukio hilo, watafikishwa mahakamani kujibu shtaka linalowakabili.

Wakati huohuo Bwana Jumapili ameendelea kuishi uhamishoni kutokana na hofu ya kuawa na anaendelea kumtafuta mkewe ili kufahamu alipo na viongozi hao wameendelea kuapa kuwa mtu yeyote atakayefuatilia suala hili atauawa.

VIONGOZI WA CHADEMA WABURUZANA MAHAKAMANI - MBEYA

Habari na Angelicia Sullusi, Mbeya.

Mwenyekiti wa Chama Cha Demokrasia na Maendeleo(CHADEMA) Wilaya ya Chunya, George Mtasha ameweka wazi azma yake ya kumpeleka mahakani Mwenyekiti wa chama hicho Wilaya ya Mbeya Mjini John Mwambigija ‘Mzee wa upako’kutokana na tuhuma alizomwelekezea za kupokea rushwa.

Akizungumza na waandishi wa habari leo Mtasha amesema kuwa amefikia uamuzi huo baada ya kutopata majibu ya barua yake ya  februari,2 mwaka huu akiiandikia ofisi ya chadema Mkoa,Mwambigija na nakala makao makuu ya chama ikimtaka Mwambigija kufuta ama kuthibitisha kauli yake aliyoitoa Januari,11 mwaka huu katika kikao cha mashauriano cha Mkoa kilichoendeshwa chini ya Katibu Mkuu wa Chadema Taifa,Dk.Wilbroad Slaa.

Mtasha amesema kuwa katika kikao hicho Mwambigija aliwaambia wajumbe kuwa Mtasha alihusika na kupokea kiasi cha shilingi  milioni moja na nusu kutoka kwa Mbunge wa jimbo wa Songwe ambaye pia ni Naibu Waziri wa Elimu na Mafunzo, Philipo Mulugo kwa lengo la kukihujumu chama.

Amesema kuwa licha ya kumtuhumu kupokea fedha hizo Mwambigija alidai kuwa Mtasha alikihujumu chama hicho katika jimbo la Songwe baada ya kumkatalia kuchukua fomu aliyekuwa mgombea ubunge wa jimbo hilo kupitia chadema Twina.

Amesema kutokana na tuhuma hizo alimtaka Mwambigija kuomba radhi ama kukanusha tuhuma hizo ambazo anadai si za kweli ifikapo machi,15 mwa huu,lakini hadi sasa hajapata majibu kutoka sehemu yeyote licha ya kupeleka nakala hizo ngazi za juu za chama.

Aidha,Mtasha ameonya kuwa endapo chama kitafumbia macho watu kama hao wenye tabia za kuendekeza majungu na fitina zisizokuwa na tija kwa malengo yao binafsi huku wakiwapakazia wenzao maneno kwa lengo la kujipatia umaarufu chama kitapoteza mwelekeo.

Amesema yeye hayuko tayari kuona chama ambacho yeye ni moja wa waanzilishi viongozi hapa Mbeya,kikisambaratika kwa ajili ya mtu mmoja anayechafua wenzao,ili hali wananchi wanakikubali na kukiamini.

Bomba Fm imewasiliana kwa njia ya simu na Katibu Mkuu wa Chadema Taifa,Dk.Wilboard Slaa aliyeko katika kampeni za uchaguzi mgodo wa ubunge Jimbo la Arumeru Mashariki ambapo alisema kuwa hajapokea barua yeyote toka kwa Mtasha.

Katika kesi hiyo Mtasha anamdai Mwambigija fidia ya shilingi milioni 80 pamoja na kulipa gharama zote za uendeshaji wa kesi hiyo.

BREAKING NEWS: MAUAJI, UCHOMAJI NYUMBA NA WIZI WA WATOTO.

* KIJIJI CHA ISANSA WILAYA YA MBOZI MKOANI MBEYA.

Mgambo wamnyongwa mwananchi katika Ofisi ya Kijiji na kumbambikiza simu mfukoni mwake, marehemu afanyiwa uchunguzi na mtu asiye na sifa katika Zahanati ya Isansa wilaya ya Mbozi, ndugu wabaini alivutwa sehemu za siri hadi mauti yalipomfika. Ndugu wadai taarifa ya uchunguzi bila mafanikio.

* Mgambo wabomoa nyumba ya mwananchi na kuteketeza kwa moto na kuharibu pikipiki na kisha kumteka mke wa mlalamikaji toka Machi 15 mwaka huu na haifahamiki, alipo mpaka sasa. Vilevile mlalamikaji aishi uhamishoni kwa hofu ya kuuawa.

*Katika moja ya Hospitali zilizopo mkoani Mbeya yatuhumiwa kubadilisha watoto mapacha, ambapo mmoja wa mapacha alidaiwa kafariki lakini mapacha hao wakutana katika moja ya shuleni ya sekondari na vyeti vyote vinaonesha walizaliwa siku na muda mmoja na vipimo vya utambuzi vinasaba (DNA) vitabaini jumapili ya wiki hili Machi 25 mwaka huu.

Watoto hao wang'ang'ania kuishi pamoja babu yao akutanishwa nao abaini kuwa ni damu yao baada ya mizimu yao kupanda, mmoja kati ya wazazi adai kulipa gharama yoyote kumkomboa pacha mwenzie.

*****Kwa habari zaidi tembelea mtandao huu*****

VURUGU ZA CCM & CHADEMA WANANE WASHIKILIWA NA JESHI LA POLISI, WANAWAKE WALIOBAKWA WATELEKEZWA BILA HURUMA WAFIKISHWA HOSPITALINI SIKU YA NNE BAADA YA TUKIO - MBEYA

Habari na Ezekiel Kamanga, Chilulumo Mbozi.

Jeshi la Polisi wilaya ya Mbozi mkoani Mbeya linawashikilia watu Nane kwa tuhuma mbalimbali zikiwemo tuhuma za kuwabaka ndugu zao .

Hata hivyo wanawake watatu waliobakwa wamefikishwa katika Hospitali ya serikali ya Wilaya hiyo baada ya kutelekezwa na maafisa wa serikali, ambapo Machi 16 mwaka huu walipofika katika kijiji hicho kufanya mkutano wa hadhara na wamesikitika kuachwa hivyo bila kupewa matibabu yoyote.

Miongoni mwa waliolazwa katika hospitali hivi sasa yupo aliyejeruhiwa vibaya kutokana na majeraha na mapanga, ambaye alikuwa akiwanusuru wanawake hao wasibakwe.

Kushikiliwa kwa watu hao kumetokana na vurugu zilizotokea Machi 11 hadi Machi 16, mwaka huu katika kijiji cha Chilulumo wilayani humo kufuatia wananchi kuihoji serikali ya kijiji mapato na matumizi ya fedha za ruzuku hali iliyozua mtafaruku miongoni mwao.

Waliokamatwa katika tukio hilo ni pamoja na katibu kata wa Chama cha Demokrasia na Maendeleo (CHADEMA) wa kata ya Chilulumo Adomari Nakambale anayetuhumiwa kuiba katika stoo ya shule ya kijiji hicho.

Kwa mujibu wa Mwenyekiti wa Chadema jimbo la Mbozi Magharibi Joseph Mwachembe alisema kutokana na tukio hilo ambalo ni la kisiasa limedaiwa kuratibiwa na Mwenyekiti wa kijiji hicho Bruno Chipungu ambaye alikasirika kuona wananchi wanataka kujua mapato na matumizi ya fedha.

Alisema kabla ya tukio hilo katibu wake wa kata ndiye aliyehoji taarifa ya mapato na matumizi katika mkutano wa hadhara jambo ambalo lilimzulia visa na hatimaye alianza kuharibiwa mali zake likiwemo duka na nyumba yake na kundi la vijana saba wanaodaiwa kutumwa na mwenyekiti huyo.

Aliongeza kuwa kufuatia kuharibiwa kwa mali zake katibu huyo alitoa taarifa katika kituo cha polisi cha wilaya hiyo kilichopo Vwawa mjini ambapo alipewa jarada la uchunguzi lenye namba MBO/RB/693/2012&MBO/IR/2012.

Alisema wanashangaa mlalamikaji katika tukio hilo naye anajumuishwa katika vurugu hizo licha ya kutoa taarifa mapema ingawa aliachiwa huru kwa dhamana baada ya kusota rumande kwa zaidi ya masaa 24.

Kwa upande wake katibu kata huyo alipohojiwa kuhusu tukio hilo mara baada ya kutoka rumande alisema anamshangaa Mkuu wa wilaya hiyo Gabriel Kimoro kumjumuisha yeye katika vurugu hizo wakati yeye ni mlalamikaji.

Mkuu wa wilaya ya Mbozi Gabriel Kimoro alisema baada ya kusikia vurugu hizo alikaa na kamati ya ulinzi na usalama ya wilaya ambapo walienda eneo la tukio Machi 16, mwaka huu ambapo waliongea na wananchi na kuwakamata wahusika ambao wako rumande na wanategemea kufikishwa mahakamani (leo) machi 19, mwaka huu.

Alisema chanzo cha vurugu hizo ni masuala ya kisiasa lakini kwa sasa hali ni shwari baada ya yeye kuenda pamoja na kamati nzima ya ulinzi na usalama ya wilaya na kongeza kuwa wanachi ndiyo waliowataja wahusika ambao walikuwa wakifanya vurugu hizo.

Aliwataja watuhumiwa hao kuwa ni katibu kata wa kata hiyo kupitia Chadema Adomari Nakambale, Agnasio Simchimba, Raymund Simfukwe na wengine wawili waliojulikana kwa jina moja moja la Yuda na Agnasio.

Wengine ni Ali Simbeye, Ivod Sambwe na Daniel Simfukwe ambao hadi sasa wako rumande wakisubiri kupelekwa  mahakamani.

“ Unajua wananchi hawahudhurii vikao na ndiyo maana wanahoji wakati tayari walikwisha somewa wengine wanaohudhuria vikao hivyo lakini hawa watu pia walitaka kukagua vitabu vya serikali wakati hawaruhusiwi kufanya hivyo na ni kinyume na sheria lakini baada ya mwenyekiti kukataa  walimpiga ngumi watu ambao walidhaniwa kuwa ni wa Chadema ndipo hata vijana wa CCM walipojibu mapigo ndiyo vurugu zikaanzia hapo lakini watu tuliowakamata hatukuangalia chama tulichoangalia ni wahusika wa vurugu,” alifafanua Mkuu huyo wa wilaya.

Kwa upande wake Kamanda wa Polisi Mkoa wa Mbeya Advocate Nyombi amethibitisha kukamatwa kwa watu nane kuhusika na vurugu hizo na kwamba watuhumiwa wote watafikishwa mahakamani baada ya taratibu zote kukamilika.

BREAKING NEWS:- CCM NA CHADEMA WATUNISHIANA MISULI WILAYA YA MBOZI.

Nyumba kadhaa zimechomwa moto baada ya kutokea mapigano makali baina ya wafuasi wa Vyama vya CCM na CHADEMA, katika Kijiji cha Chilulumo, Wilaya ya Mbozi, Mkoani Mbeya.

*****Mtandao huu unaelekea eneo la tukio na endelea kufuatilia, ili kupata habari  zaidi******.

WANAFUNZI 60 WANUSURIKA KIFO BAADA YA LORI KUPINDUKA MKOANI MBEYA.

Kwa hali hii kuna usalama na mtu kupona kweli?.

******

Habari na Ezekiel Kamanga, Mbeya.

Wanafunzi 60 wa jinsi ya Kiume wa Shule ya Sekondari Simbega Kata ya Iyula, Wilaya ya Mbozi Mkoani Mbeya wamenusurika kifo baada ya lori walilokuwa wakisafiria, kutoka Kijiji cha Ruanda wilayani humo kuacha njia na kisha kupinduka.

Ajali hiyo imeyokea mita chache baada ya kupanda lori hilo, ambapo, wanafunzi wenzao wa jinsi ya kike kutangulia na lori jingine wakitokea mchezoni baada ya dereva wa lori hilo Bwana Juhudi Shonde kushindwa kulimudu gari hilo wakati likipanda mlima ndipo alipoamua kuruka na kuliacha gari hilo likirudi nyumba na kisha kupinduka likiwa na wanafunzi ndani.

Tukio hilo limetokea majira ya saa 3 usiku Februari 16, ambapo kati ya wanafunzi 60 waliokuwemo 37 na mwalimu mmoja wamejeruhiwa na kukimbizwa katika Hospitali ya Serikali Mbozi na wanafunzi wanane na mwalimu mmoja wamelazwa katika Hospitali ya Ifisi, Wilaya ya Mbeya Vijijini.

Miongoni mwa majeruhi waliolazwa katika Hospitali ya Mbozi wawili hali zao ni mbaya kutokana na kuvunjika miguu na Daktari wa zamu aliowapokea amewataja kuwa ni pamoja na Bahati Mwashambwa na Ajuaye Shonde na wliopo Hospitali ya Ifisi ni Mwalimu Enock Mabula ambaye ameumia goti na kupata majeraha.

Kwa upande wake Mkuu wa Shule hiyo Bwana Jacob Nsenye, amesema wazazi wa wanafunzi hao wasiwe na hofu hali zao zinaendelea vema kwa mujibu wa daktari.

MAMIA WAJITOKEZA KUPIMA MAGONJWA YA KISUKARI, SHINIKIZO LA DAMU NA UNENE - MBEYA

 Zoezi la kupima magonjwa ya Kisukari, shinikizo la damu na unene ambapo vipimo hivyo hutolewa bure na wataalamu wa afya kutoka AFPTA katika viwanja vya Ruanda Nzovwe jijini Mbeya.

 Mgeni rasmi Kaimu Mganga Mkuu wa mkoa  Luis Choboko, akihutubia wananchi waliojitokeza katika zoezi la kupima magonjwa ya Kisukari, shinikizo la damu na unene ambapo vipimo hivyo hutolewa bure na wataalamu wa afya kutoka AFPTA katika viwanja vya Ruanda Nzovwe jijini Mbeya.

 Zoezi la kupima magonjwa hayo, katika Wilaya ya Mbozi mkoani hapa.

 Mgeni rasmi Kaimu Mganga Mkuu wa mkoa  Luis Choboko, akipima magonjwa ya Kisukari, shinikizo la damu na unene ambapo vipimo hivyo hutolewa bure na wataalamu wa afya kutoka AFPTA katika viwanja vya Ruanda Nzovwe jijini Mbeya.

Habari na Ezekiel Kamanga, Mbeya.

Mamia ya wakazi wa jiji la Mbeya wamejitokeza jana katika viwanja vya Ruanda Nzovwe kwa ajili ya kupima magonjwa ya Kisukari, shinikizo la damu na unene ambapo vipimo hivyo hutolewa bure na wataalamu wa afya kutoka AFPTA.

Akifungua zoezi hilo Kaimu Mganga Mkuu wa mkoa  Luis Choboko amesema zoezi hilo linamanufaa makubwa kwa wananchi ambapo ametoa wito kwa jamii kujitokeza kwa wingi kupima afya zao.

Amesema zoezi hilo limelenga kupunguza msongamano wa watu kwenye vituo vya afya ambao huenda kwa ajili ya kupima zao na kwamba zaoezi hilo linatarajiwa kumalizika kesho.

Zoezi la upimaji wa afya katika viwanja vya shule ya Msingi Ruanda Nzovwe linakwenda sambamba na utoaji wa elimu ya mwananchi kujiunga na mifuko ya jamii.

Hata hivyo zoezi hili lilianzia wilaya ya Mbozi na kupata mafanikio makubwa, na kwamba zoezi litamalizika Machi 18 mwaka huu Jijini Mbeya na kuendelea katika mikoa ya Mwanza na Arusha.

MKUU WA MKOA WA MBEYA MH. KANDORO AKEMEA VITENDO VYA WATUMISHI KUGEUZA OFISI KAMA VIJIWE VYA POROJO.

Mkuu wa Mkoa wa Mbeya Abbas Kandoro (Kushoto) akikabidhiwa Mwenge wa uhuru na Mkuu wa Mkoa wa Rukwa Mhandisi Stellah Manyanya (kulia), baada ya kumaliza mbio zake mkoani Rukwa.

******

 Habari na mwandishi maalum.

 Mkuu wa mkoa wa Mbeya Abbas Kandoro amekemea vitendo vya baadhi ya watumishi katika idara za serikali kugeuza ofisi zao vijiwe vya kupigia porojo badala ya kufanya kazi.

Ameyasema hayo wakati akizungumza na watumishi na viongozi wa serikali ya wilaya ya Rungwe, watumishi wa halmashauri, viongozi wa dini pamoja na baadhi ya wakazi wa wilaya hiyo kabla ya kuanza ziara ya kutembelea miradi mbalimbali ya maendeleo.

Amesema wapo baadhi ya watumishi ambao wamekuwa wakiendeleza mazungumzo yasiyo na tija kwenye ofisi za Umma jambo ambalo limekuwa likichangia kwa kiasi kikubwa kuzorota kwa shughuli za kimaendeleo.

Aidha amewataka watumishi wa Serikali, watendaji na madiwani kufanya kazi kwa kushirikiana ili kuboresha utendaji kazi wao badala ya kuwekeana matabaka ya kiutendaji.

WANANCHI WALALAMIKIA KUTOSOMEWA TAARIFA YA MAPATO NA MATUMIZI - MBEYA.

Habari na Mwandishi wetu

Wakazi wa mtaa wa Isanga kati kata ya Isanga jijini Mbeya wamekuwa wakitozwa shilingi mia tano kila mmoja kwa  ajili ya kulipia pango la ofisi ya mwenyekiti wa mtaa huo.

Wakiongea na mwandishi wetu baadhi ya wananchi wamesema wamekuwa wakichangia fedha hizo pasipo kupewa taarifa za mapato na matumizi ikiwa ni pamoja na kiwango kinachohitajika kwa ajili kulipia pango la ofisi hizo.

Mmoja wa wakazi wa mtaa huo Hasan Musa na Mzee Mbeye amesema kuwa fedha hizo wamekuwa wakichangishwa pasipo kupewa stakabadhi.

Bomba Fm iliwasiliana na afisa mtendaji kata ili aweze kutolea ufafanuzi suala hilo hata hivyo alisema kuwa jambo hilo lipo chini ya Diwani wa kata hiyo kupitia chama cha CHADEMA bwana Dor Muhamed Issa ambaye naye amesema kuwa Mkurugenzi wa jiji ndiye anayeweza kulitolea ufafanuzi suala hilo.

VINYESI VYATAPAKAA OFISI YA WALIMU, WALIMU WASHINDWA KUFUNDISHA SHULE YA MSINGI JUHUDI ILEMI - MBEYA

Habari na Ezekiel Kamanga, Mbeya.

Walimu wanaofundisha katika Shule ya msingi Juhudi Ilemi, Kata ya Iganzo jijini Mbeya wameendelea kupata adha ya vinyesi vya ajabu vya binadamu, ambapo Machi 15 mwaka huu majira ya asubuhi viti vyote vinavyokaliwa na walimu vilikutwa vimepakazwa vinyesi na harufu kali kutanda Ofisi hiyo ya walimu.

Mbali na hili pia mapazia yakiwa yamechomwa na moto wa ajabu unaohusishwa na imani za kishirikina, kwani milango ya ofisi hiyo ilifungwa kwa kufuri na nje akiwepo mlinzi.

Mwalimu Mkuu wa shule hiyo Bwana Charles Mveya amesema tukio hilo ni mfulululizo wa matukio 17 yaliyofanyika mapema mwaka huu tangu likizo ilipoisha na shule kufunguliwa Januari mwaka huu.

Hali hiyo ilipelekea wazazi kuamua kuitisha mkutano huyo ili kujadili mstakabali mzima wa jambo hilo kwa kuhusisha Afisa Elimu wa Jiji la Mbeya, Wachungaji na wazazi, ambapo vitendo hivyo vilikoma kwa muda wa wiki moja tangu ulipoisha mkutano.

Hata hivyo mkutano uliofanywa hivi karibuni ulimtuhumu Mwalimu Kyando, kuwa ndiye mhusika wa matukio haya kwa lengo la kupata wadhifa wa Mwalimu Mkuu.

Mkutano huo haukumalizika vema kwani baadhi ya wazazi na wananchi walimsakama mwalimu huyo na baada ya kumpata walimpiga na kuokolewa na Jeshi la Polisi, ingawa wananchi walifanya uharibifu mkubwa nyumbani kwake naye kulazwa katika Hospitali ya Rufaa iliyopo jijini hapa.

Ofisi ya Elimu jiji iliingilia kati baada ya kumhamishwa Mwalimu Kyando katika shule hiyo na hivi sasa anaishi mafichoni akiwa na familia yake baada ya kutoka hospitalini.

Aidha Afisa Elimu wa Mkoa Bwana Juma Kaponda, amelazimika kufika shuleni hapo na kujionea hali halisi na adha kubwa kwa walimu wake huku wazazi wasijue kinachoendelea shuleni hapo.

Naye, Katibu wa Muungano wa Jamii Tanzania (MUJATA) alifika shuleni hapo na kuahidi kuwa asasi yake itabidi iingilie kati, ili kukomesha vitendo hivyo baada ya Mashehe na wachungaji kushindwa.

Mbali na matukio hayo shule hiyo ni miongoni mwa shule zinazoongoza kwa kufaulisha wanafunzi kimkoa na kitaifa kwa hiyo matukio hayo yanaweza kuharibu morali ya walimu  na wanafunzi alibainisha mmoja wa walimu wa shule hiyo.

Kwa upande wake Mkuu wa wilaya ya Mbeya Bwana Evans Balama, inaendelea na uchunguzi wa tukio hili ili wanafunzi wasiathirike kimasomo na kuwatoa hofu walimu na kuendelea kufundisha huku serikali ikiliangalia kwa kina jambo hili.