UKOSEFU WA ELIMU YA UJASILIAMALI KWA WAKAZI NDIO CHANZO CHA UMASIKINI WILAYANI ILEJE + MBEYA

Na mwandishi wetu

Ukosefu wa elimu ya ujasiriamali kwa baadhi ya wakazi wilayani Ileje mkoani Mbeya umetajwa kuwa chanzo cha umasikini wilayani humo.

Hayo yamebainika kwenye kikao cha umoja wa wakazi wa Ileje waishio Tunduma kilichofanyika hivi karibuni wilaya mpya ya Momba mji wa Tunduma.

Washiriki wa mkutano huo wamesema kuwa umasikini kwa baadhi ya wananchi wilayani Ileje unatokana na ukosefu wa elimu ya ujasiriamali pamoja na msukumo wa kujituma katika shughuli mbalimbali za kimaendeleo.

Madhumuni ya kuanzishwa kwa umoja huo ni kujengeana uwezo wa kujishughulisha kwenye shughuli mbalimbali za kijamii, Biashara na Kilimo.

MMRP MBEYA YAVITAKA VYAMA VYA SIASA KUTOA USHIRIKIANO KWA LENGO LA KUHAMASISHA JAMII KUSHIRIKI KATIKA TAFITI.

Na mwandishi wetu

Mratibu wa shughuli za nje kutoka Kituo cha Utafiti wa Afya mkoa wa Mbeya (MMRP) Bwana Weston Assisya amewataka wanasiasa kutoa ushirikiano kwa kituo hicho ili kuhamasisha jamii kushiriki kwenye tafiti badala ya kupandikiza chuki juu ya tafiti zinazoendelea.

Ameyasema hayo wakati wa mahojiano nasi ofisini kwake juu ya kauli zinazotolewa na baadhi ya wanasiasa na jamii kuhusu tafiti zinazofanywa na kituo hicho.

Awali baadhi ya viongozi wa kisiasa mkoani Mbeya walikuwa wakitoa lawama kwa Serikali kwa kukubali tafiti za magonjwa mbalimbali kufanywa kwa wananchi kwa madai kupitia tafiti hizo wananchi wamekuwa wakipandikizwa Virusi vinavyosababisha Ukimwi na magonjwa mengine.

Kituo cha Utafiti wa Tiba na Dawa mkoa wa Mbeya (MMRP) kinafanya tafiti za kinga dhidi ya UKIMWI, MARALIA, KIFUA KIKUU, KICHOCHO na MATENDE.

ASHIKILIWA NA JESHI LA POLISI MKOANI MBEYA KWA KOSA LA KUMSHINIKIZA MKEWE KUNYWA SUMU HADI KUFARIKI

 Kamanda wa polisi wa mkoa wa Mbeya Advocate Nyombi.

 Mtuhumiwa Bwana Mohamed Mwawipa ambaye alimshinikiza mkewe Nuru Masuba kunywa sumu baada ya kumtuhumu kuwa amemwibia fedha taslimu shilingi laki nne na elfu hamsini akionesha askari wa upelelezi eneo alilonywea sumu mkewe

Mweyekiti wa kijiji cha Ijumbi kata ya Ruiwa wilaya ya Mbrali Bwana John Mkalimoyo akimfariji dada wa marehemu Nuru Masuba aitwaye Stumai Wilson ambapo marehemu alikuwa akiishi naye Kijiji cha Mapogolo kapunga.

Mwili wa marehemu Nuru Masuba aliyeshinikizwa kunywa sumu baada ya kutuhumiwa kumwibia fedha shilingi laki nne na elfu hamsini na Mumewe Mohamed Mwawipa akipelekwa kuhifadhiwa kaburini, baada ya uchunguzi wa daktari na polisi kukamilika.

*****

Na mwandishi wetu

Mohamed Mwawipa mwenye Umri wa miaka 50 mkazi wa kijiji cha Ijumbi kata ya Luwiwa wilayani Mbarali mkoani Mbeya ameshikiliwa na Jeshi la Polisi wilayani humo kwa tuhuma za kumshinikiza mkewe kunywa sumu baada ya kumtuhumu kumwibia shilingi laki nne na elfu hamsini.

Habari kutoka eneo la tukio zinaeleza kuwa marehemu Nuru Masuba alikuwa na ugomvi kwa kipindi kirefu na mumewe hali iliyopelekea wakatengana lakini October 4 walirejeana upya mahusiano yao hadi kifo kilipomfika.

Akiongelea tukio hilo mwenyekiti wa kijiji cha Ijumbi John Kalikumoyo amesema mtuhumiwa alikiri kutenda tukio baada ya kuhojiwa na uongozi wa kijiji na kwamba endapo mwanamke huyo asigekubali kunywa sumu angetumia silaha ya jadi aina ya kisu kumuangamiza kama fedha hizo hazitoonekana.

Kamanda wa polisi mkoa wa Mbeya Advocate Nyombi alipomuulizwa juu ya kukamatwa kwa Mohamedi Mwawipa alisema kuwa taarifa hizo bado hazijamfikia na kwamba atazitolea ufafanuzi pindi atakapo pata taarifa kamili kutoka kwa mkuu wa polisi wilaya ya Mbarali.

RC MBEYA MHESHIMIWA ABASI KANDORO AWATEMBELEA WAANDISHI WA HABARI MKOANI HUPA NA KUSISITIZA USHIRIKIANO WA KUTOA NA KUPATA HABARI .

Hawa ni waandishi  wa habari mkoani mbeya kwa miaka minne iliyopita wakiwa nje ya Ukumbi wa Mkutano wa MKAPA uliopo jijini Mbeya na kupiga picha ya pamoja.

*****

Na mwandishi wetu

Mkuu wa mkoa wa Mbeya Abasi Kandoro amefanya ziara maalumu ya kutembelea ofisi ya Chama Cha waandishi wa habari mkoani hapa na kusisitiza ushirikiano wa kutoa na kupata taarifa kutoka Serikalini.

Aidha amewataka wakuu wa idara wa halmashauri na Serikali kuhakikisha wanatoa taarifa kwa waandishi wa habari ili kuiwezesha jamii kufahamu mambo muhimu yanayoendelea mkoani mwao.

Kuhusu suala la Pembejeo Kandoro amesema pembejeo hizo za Ruzuku zimeanza kusambazwa kwa wilaya ya Mbeya na Rungwe huku akitoa onyo kali kwa mawakala ambao hawatatekeleza maagizo yaliyotolewa na Serikali katika ugawaji wa pembejeo hizo.

Kwa upande wa masoko amesema ofisi yake imeandaa kamati ya kukabiliana na majanga ya moto ambapo kamati hiyo itakuwa na jukumu la kupanga miundombinu ya Soko ili kurahisisha zoezi la ukoaji kufanyika kiurahisi pindi moto unapotokea.

Wakati huohuo ameitaka jamii kushiriki kikamilifu katika ulinzi pamoja na kufanya kazi kwa bidii badala ya kutumia njia za mkato kujipatia kipato kwa imani za kishirikina.

WABUNGE MBEYA WATAKIWA KUSHIRIKIANA NA SERIKALI YA MKOA - RC MBEYA

Mkuu Mpya wa Mkoa wa Mbeya Abbas Kandoro baada ya kumaliza kula kiapo sasa aanza kuutumikia Mkoa wa Mbeya.

*****

Na mwandishi wetu 

Mkuu wa mkoa Mbeya Abasi Kandoro amewataka wabunge mkoani hapa kushirikiana na Serikali ya mkoa ili kurahisisha huduma za Serikali kwa watu wake.

Akiongea na waandishi wa Habari katika ofisi za chama Chao Kandoro amesema kuwa umoja na mshikamano kati ya viongozi wa Serikali na wabunge ndio njia pekee ya kutatua kero na matizo yanayowakabili wananchi.

Aidha amewataka wabunge hao kuondoa itikadi za kisiasa katika utendaji wa kazi ili kuleta maendeleo kwa wananchi ikiwa ni pamoja na kuwa tayari kutangaza maendeleo yaliyofanywa na Serikali badala ya kukosoa pekee.

Wakati huohuo Serikali imetoa matrekta na powertila kwa wakulima ikiwa ni njia ya pekee ya kuwawezesha wakulima hao kuondokana na kulimo cha jembe la mikono ambalo limekuwa likichangia wakulima kutopata mazao mengi.

MITIHANI YA TIFA KWA KIDATO CHA PILI YA RUDI, WALIOKOSA ELIMU YA SEKONDARI + CHUNYA + MBEYA KUSOMA BURE

 Naibu Waziri wa elimu na mafunzo ya ufundi Tanzania Philipo Mulugo ambaye ni Mbunge wa Jimbo la Songwe lililopo wilayani Chunya mkoani Mbeya aliyesimama akitoa hotuba katika moja ya mikutano yake.

Na mwandishi wetu.
Naibu waziri wa elimu na mafunzo ya ufundi mheshimiwa Philipo Mulugo amesema serikali imerejesha mtihani wa taifa wa kidato cha pili ili kupunguza kushuka viwango vya ufaulu hasa kwa kidato cha nne nchini.

Ameyasema hayo wakali alipokuwa akiwahutubia wananchi waliompa dhamana ya ubunge katika jimbo la Songwe, wilaya ya Chunya mkoani Mbeya na kuongeza kuwa wastani wa ufaulu wa mtihani huo utakuwa ni alama 25.


Amesisitiza kwa kusema kwamba kuanzia mwaka huu hakuna mwanafunzi ambaye ataruhusiwa kuendelea na masomo ya kidato cha tatu kama hatukuwa amefanya mtihani wa kidato cha pili na kupata alama zilizowekwa. 


Taarifa tulizozipata zinadai kuwa wanafunzi ambao wamekuwa wakifanya vibaya katika mitihani yao ya kidato cha nne ndio hao ambao wamekuwa wakifanya vibaya katika mitiyani yao ya kidato cha pili 

 

Wakati huo huo mheshimiwa Mulugo amesema wananchi waliokosa elimu ya Sekondari wametangaziwa neema ya kusoma bure elimu ya Sekondari Jimboni humo.

Mulugo alisema kuwa kwa kuanzia tayari anasomesha wananchi 20 jambo ambalo alisema kuwa linamuumiza kwani yupo tayari kuwalipia wananchi wote wenye uhitaji wa elimu hiyo ya Sekondari ambapo anatarajia kuanzisha Maktaba ya Jimbo ambayo itakuwa eneo la Mkwajuni.

Alisema kuwa Jimbo hilo la Songwe na wilaya nzima ya Chunya ni moja ya wilaya ambazo zipo nyuma sana kielimu jambo ambalo viongozi wanaopata fursa akiwemo yeye ni lazima wafanya jitihada za kuwasaidia wenye uhitaji.

Naibu Waziri huyo wa elimu maarufu kama Mulugo Ahadi umepata, aliongeza kuwa kufikia mwakani 2012 atafarijika endapo wananchi hao watajitokeza kujiunga na vituo hivyo vinavyotoa mafunzo ya elimu ya Sekondari kwasababu ulimwengu uliopo sasa unahitaji wasomi ili kukabiliana na changamoto mbalimbali zinazoukabili.

HATARINI KUKUMBWA NA MAGONJWA YA MLIPUKO KUTOKANA NA KUTOFUATA TARATIBU ZA KUHIFADHI TAKA KATA YA ILEMI JIJINI MBEYA

Hivi ndivyo taka zinavyohifadhiwa pasipo kufuata utaratibu wa kuzitumbukiza ndani.

=====

Na mwandishi wetu

Wananchi wa kata ya Ilemi jijini Mbeya wapo hatarini kukumbwa na magonjwa ya mlipuko kutokana na uchache wa madampo ya kuhifadhia taka hali inayowalazimu wakazi wa eneo hilo kutupa taka ovyo.

Afisa mtendaji wa kata hiyo Bi. Eva Kelioni amesema kutokana na uhaba huo wa madampo, wakazi wamekuwa wakitupa taka katika mitaro ya kupitishia maji taka na mto Magege.

Ameongeza kuwa licha ya dampo la kuhifadhia taka kuletwa bado baadhi ya wakazi wa kata hiyo wamekuwa wakitupa taka pembezoni mwa dampo hilo hali ambayo inawawia vigumu watu wa usafi kutoka halmashauri ya jiji kuondoa taka hizo kwa wakati muafaka.

Wakati huo huo amewaonya wananchi wanaoishi pembenzoni mwa mto Magege kutotupa taka kwenye mto huo ili kuondoa mazalia ya mbu ambao wanaweza kusababisha ugonjwa wa maralia.

UBOVU WA MIUNDOMBINU NI CHANZO KIKUBWA KWA WAFANYABIASHARA NA WATEJA KUKIMBIA SOKO + MBEYA

Na mwandishi wetu.

Uongozi wa soko la Isanga jijini Mbeya umesema ubovu wa miundombinu ya soko pamoja na barabara inayoingia sokoni hapo ni moja ya sababu inayochangia soko hilo kukosa huduma za bidhaa muhimu zinazohitajika na wateja.

Mwenyekiti wa soko hilo Bwana Aidani Mwashigaire amesema kutokana na ubovu wa barabara wafanyabiashara wa soko hilowamekuwa wakilazimika kulihama soko hilo na kwenda soko la Darajani ambalo ni rahisi kufikisha bidhaa sokoni.

Aidha ameuomba uongozi wa halmashauri ya jiji la Mbeya kuangalia upya maamuzi yao kwa kulipitisha soko la darajani na badala yake, ameuomba uongozi huo kuwaunganisha wafanyabiashara wa darajani na wale wa Isanga.

VIONGOZI CCM KATA YA ISANGA JIJINI MBEYA WAJIUZULU

 Katibu wa Chama Cha Mapinduzi Kata ya Isanga jijini Mbeya Bwana Tenson Mtafya akionesha kadi ya uanachana ambapo alichukua fursa ya kujiuzulu na kukitaka chama hicho, kuwaondoa watendaji wabovu katika kata hiyo na kupinga vikali tuhuma zilizoelekezwa kwake pamoja na Mwenyekiti wa chama hicho kuwa walihusika  kumdhalilisha mwenyekiti wa mtaa wa Igoma "A" Bwana Juma Kahawa hali iliyopelekea Bwana Kahawa kuwafikisha mahakamani na kutonzwa faini ya shilingi elfu 80  na bila kupewa stakabadhi ya malipo hayo mahakamani

Wajumbe wa kamati ya siasa ya Chama Cha Mapinduzi Kata ya Isanga jijini Mbeya ambao wamejiuzulu baada ya Viongozi wa Chama chao Mwenyekiti na Katibu wao kufikishwa mahakamani na kuwekwa mahabusu kwa muda wa masaa matano

OFISI YA AFISA MTENDAJI WA KATA YAACHWA WAZI MIDA YA KAZI PASIPO UANGALIZI JIJINI MBEYA

 Ofisi ya Afisa mtendaji wa Kata ya Isanga jijini Mbeya ikiwa imefunguliwa na kuachwa wazi pasipo kuwepo na mtu yeyote kwa zaidi ya masaa matatu, kuanzia muda wa majira ya saa 5 asubuhi hadi saa 8 mchana ikiwa mida ambayo mtumishi anatakiwa kuwa kazini kutatua matatizo ya jamii, halikadharika nyaraka za serikali zikiachwa. Je huu ni Uwajibikaji kwa watendaji wa serikali, hivi Maadili ya viongozi na utawala bora yanazingatiwa.

Mtandao huu umeweza kumsubiri Afisa Mtendaji wa Kata ya Isanga jijini Mbeya Bi Ever George kwa takribani muda wa masaa matatukuanzia muda wa majira ya saa 5 asubuhi hadi saa 8 mchana, na hakuwa tayari kupokea simu yake, Je wangapi wanapata usumbufu katika kata zetu, Sekretarieti ya Maadili ya viongozi na Utawala bora inapaswa kuchunguza tabia hizi kwa mtu aliyepewa dhamana ya kuitatulia matatizo jamii.

HALMASHAURI YA WILAYA YA RUNGWE MKOANI MBEYA YAOMBWA KUBORESHA MIUNDOMBINU YA SOKO + TUKUYU

 Makao Makuu wa Wilaya ya Rungwe Mkoani Mbeya.

Na mwandishi wetu.

 Halmashauri ya wilaya ya Rungwe mkoani Mbeya imeombwa kuboresha miundombinu ya soko la Tukuyu ilikuweka mazingira bora ya uwekezaji.

Tamko la ombi hilo limetolewa na wafanyabiashara wa soko hilo ambao wamesema kwa muda mrefu soko hilo limekosa mifumo thabiti ya kutililisha maji machafu hali inayoweza kusababisha magonjwa ya mlipuko wakati wa msimu wa mvua.

Aidha uchunguzi uliofanya na mwandishi wetu umebaini kuwa soko hilo halina barabara za ndani sababu inayochangia kushindwa kuokoa bidhaa linapotokea janga la moto na wakati mwingine kushindwa kuingiza bidhaa zinazobebwa kwenye magari.

Kwa upande wake Mwenyekiti wa soko hilo Bwana Almas Yazidu amesema uhaba wa umeme wa uhakika pamoja na vyoo visivyo na sifa sitahiki imepelekea wafanyabiashara wengi kutowekeza mitaji yao mikubwa sokoni hapo na hivyo halmashauri hiyo kukosa mapato ya kutosha.

Chanzo chetu kilipojaribu kuwatafuta viongozi wa halmashauri hiyo wanaosimamia soko hilo na kuambiwa kuwa viongozi wapo nje ya ofisi kikazi.

VIJANA ACHANENI NA VIJIWE VYA SOGA, JISHUGHULISHENI MUWEZE KUJIPATIA KIPATO - MBEYA

Upondaji kokoto

 Na mwandishi wetu.

Vijana wametakiwa kujishughulisha katika shunguli halali na salama ambazo zitawawezesha kujipatia kipato cha kutosha badala ya kukaa vijiweni na kupiga soga.

Ushauri huo umetolewa na wakulima wa bonde la Umwagiliaji kata ya Igawilo jijini Mbeya kufuatiwa kuwepo kwa malalamiko yanayotolewa na baadhi ya vijana kuhusu ajira.

Aidha wameziomba halmashauri nchini kuandaa mpango utakao wawezesha vijana kujituma katika shughuli za kilimo ili kujenga uchumi wao na taifa kwa ujumla.

Kwa upande wao vijana wa eneo hilo wamesema uhaba wa mitaji na riba kubwa inayotozwa na taasisis za kifedha nchini mara baada ya kurejesha mikopo ni moja ya sababu zinazochangia vijana wengi kukimbilia katika shughuli za upondaji kokoto.

Mwandishi wetu ameshuhudia idadi kubwa ya vijana wanaoishi pembezoni mwa bonde hilo wakijishughulisha na upondaji wa kokoto huku wazee wakijishughulisha na kilimo cha umwagiliaji.

WAFANYABIASHARA JIJINI MBEYA WATAKIWA KUFANYA BIASHARA KATIKA MAZINGIRA SAFI

 Usugu huu wa uchafu kukithiri na kutotolewa kwa wakati muafaka ni kero kwa wakazi wa jiji la Mbeya.

Na mwandishi wetu.

Wafanyabiashara jijini Mbeya wametakiwa kuboresha usafi wa mazingira kwa kufanya biashara zao katika maeneo maalumu yaliyotengwa kwa dhumuni la biashara husika.

Hayo yamesemwa na Mkuu wa wilaya ya Mbeya Bwana Evans Balama wakati wa mahojiano na mwandishi wetu kuhusiana na uchafu uliokithiri katika vituo mbalimbali vya kufanyia biashara.

Ameeleza kuwa kumekuwa na baadhi ya wafanyabiashara  ambao wanafanyabiashara zao maeneo ambayo si rasmi hivyo kupelekea uchafunzi wa mazingira hali inayoweza kusababisha magonjwa ya mlipuko ukiwemo ugonjwa wa kipindupindu.

Aidha Bwana Balama ametahadharisha kwamba ofisi yake haitasita kuwachukulia sheria wafanyabiashara wenye tabia ya kuchafua mazingira hali inayopelekea jiji kuwa katika hali ya uchafu.

WACHUNGAJI WA KKKT DAYOSISI YA KONDE MBOZI - MBEYA - WAKOSA IMANI NA KAMATI MPYA YA MAADILI

Maaskofu pamoja na wachungaji na viongozi wengine wa usharika wa Vwawa na jimbo la Magharibi Mbozi.

+++++

Na mwandishi wetu.

Baadhi ya wachungaji wa kanisa la kiijili la Kilutheri Tanzania dayosisi ya Konde wamesema hawana imani na kamati ya utekelezaji wa halmashauri ya kichungaji inayoongozwa na Baba askofu Dakta Peter Mwakyolile ambayo inasimamia maadili na usuluhishi  baina ya wachungaji.

Wakizungumza na chanzo hiki kwa nyakati tofauti kwa masharti ya kutotajwa majina yao wachungaji hao wamesema kujiuzulu kwa Katibu wa kamati hiyo Mchungaji Michael Ambangile kumetokana na mvutano wa muda mrefu kati yake na mkuu wa Jimbo la Magharibi Mchungaji Nyibuko Mwambola ambaye ni mjumbe wa kamati.

''Sababu ya kujiuzulu kwangu ni kutokana na mvutano wa muda mrefu kati yangu na mtumishi mwenzangu'' alisema Mchungaji Ambangile kupitia barua iliyomwandikia Askofu wa dayosisi hiyo.

Nao baadhi ya wachungaji na waumini wamemwomba Askofu wa dayosisi hiyo kuivunja kamati iliyoteuliwakwani baadhi ya wajumbe huendekeza majungu, mabishano na malumbano yasiyokuwa na tija yoyote kwa kanisa.

Kwa upande wake Mwambola amesema hajawahi kuwa na ugomvi na Mchungaji Ambangile na hajapata nakala ya barua iliyoandikwa kuhusu malalamiko yanayo mkabili.

WALEMAVU WATAPATIWA HAKI ZAO ZA KIMSINGI LINI?

 Sio kuwatenga, sio kuwaacha kwani sote ni ndugu wapewe haki zao kwani hawakujitakiwa kuwa walemavu.
+++++

Na mwandishi wetu.

Serikali, makampuni wa wadau mbalimbali wa masuala ya ujenzi nchini wametakiwa kujenga majengo kwa kuzingatia kuweka miundombinu sahihi ambayo itawawezesha walemavu kupata haki zao za kimsingi au huduma halali katika majengo hayo.

Rai hiyo imetolewa na Kaimu mwenyekitio wa Chama cha walemavu Tanzania ndani ya mkoa wa Mbeya (CHAWATA) Bwana Jimmy Ambilikile wakati wa mahojiano na chanzo hiki.

Amesema iwapo majengo ya huduma muhimu yatajengwa kwa kuzingatia mazingira ya kundi hilo maalumu yatawezesha malemavu kupata huduma zao bila usumbufu wa aina yoyote.

Walemavu wamekuwa wakishindwa kufikia huduma muhimu za kijamii kutokana na makandarasi wa ujenzi kutojenga majengo yao kwa kutokufikilia kundi hilo maalumu.

Aidha uchunguzi uliofanywa na mtandao huu umebaini kuwa ofisi mbalimbali zikiwemo taasisi za kifedha, afya na vyuo kutokuwa na miundombinu bora inayowawezrsha walemavu kupata huduma zao kwa urahisi.

KUJISHUNGULISHA KATIKA SHUGHULI MBALIMBALI NA ZA HALALI NDIO MSINGI BORA WA KUJIPATIA KIPATO - DC MBEYA BWANA BALAMA

 Na mwandishi wetu.

Serikali na imeitaka jamii kujishughulisha katika shughuli zilizo halali ambazo zinawawezesha kujipatia kipato badala ya kujishughulisha katika vitendo haramu ambavyo vimekuwa vikiwapelekea  baadhi yao kuingia mikonono mwa sheria  na wengine kuishia mikononi mwa wananchi wenye hasira kali.

Agizo hilo limetolewa na Mkuu wa wilaya ya Mbeya Bwana Evansi Balama kwa niaba ya Mkuu wa mkoa wa Mbeya ambaye alialikwa kuwa mgeni rasmi katika kampeni za kushawishi jamii kutii sheria bila kushurutisha kwa lengo la kudumisha amani, usalama na utulivu mkoani hapa.

Amesema uwajibikaji katika kazi ndio njia pekee itakayo mwezesha mwananchi kujipatia kipato na sio kwa njia ya unyang'anyi na kujiingiza katika shughuli haramu.

Awali akimkaribisha Mkuu wa wilaya, Kamanda wa polisi mkoa wa Mbeya Advocate Nyombi amesema kuwa kupitia kampeni hiyo Jeshi la polisi linatarajia kuona ushirikiano bora kati yao na wananchi katika kusimamia ulinzi wa mali na maisha ya raia.

WASHIKILIWA NA JESHI LA POLISI KWA KOSA LA KUDAIWA KUHUSIKA NA MAUAJI YA MTU MMOJA OMEGA BAR JIJINI MBEYA

 Moto wenye utata umeteketeza chumba kimoja cha Bar inayoitwa Omega inayomilikiwa na Mrs Ngwada iliyopo mtaa wa Ilolo jijini Mbeya, majira ya saa Kumi na mbili jioni na mtu mmoja aliyefahamika kwa jina la Ansen Mtono wenye umri wa miaka 23 afariki dunia.Marehemu amekaa chumba hicho kwa muda wa siku mbili na alikuwa anadaiwa shilingi elfu hamsini ya bili ya vinywaji.

 Na mwandishi wetu.

Ema Ngwanda mkazi wa RRM mwenye umri wa miaka 36 na Neria Meshaki mwenye umri wa miaka 20 mkazi wa Isanga jijini Mbeya wanashikiliwa na Jeshi la Polisi mkoani Mbeya kwa tuhuma za kumchoma moto hadi kufa Hanseni Mtono wakimtuhumu kusababisha hasara ya shilingi elfu hamsini katika baa ya Omega iliyopo Isanga.

Kamanda wa polisi mkoa wa Mbeya Advocate Nyombi amesema tukio hilo limetokea jana majira ya saa kumi na moja za jioni ambapo watuhumiwa walimfungia marehemu kwenye chumba ambacho kilimwagiwa petroli kisha wakawasha moto.

Naye dada wa marehemu Jackline Mtono amesema kuwa septemba 28 mdogo wake alifungiwa kwenye chumba hicho kwa madai kuwa alisababisha hasara ya shilingi elfu 50 ambazo ni mtaji wa bia na kwamba baada ya mama yeke mzazi kwenda kuongea na wahusika waligoma kumtoa hadi hapo watakapo kuwa wamelipwa fedha zote.

Ameongeza kuwa baada ya siku moja kupita walipata taarifa ya ndugu yao kuchomwa moto akiwa ndani ya chumba alichofungiwa.

Hata hivyo majira ya saa kumi na mbili jioni wananchi wenye hasira kali walivamia na kuvunja bar ya Omega na kufanya uharibifu na kuviharibu vitu kadhaa ikiwemo TV na vilivyobaki vilibebwa na ndugu wa mlalamikiwa wakidai kwanini muuaji ameachiwa.

MGOMO WA WANAFUNZI WAPELEKEA CHUO CHA UUGUZI IFISI MKOANI MBEYA CHAFUNGWA KWA MUDA WA WIKI MOJA

 Bweni la Wanawake katika Chuo cha uuguzi cha Ifisi

 Wanafunzi wa chuo hicho wakiwa katika harakati za kuondoka chuoni hapo.

Na mwandishi wetu.

Chuo cha uuguzi na maabara kinachomilikiwa na Kanisa la uinjilisti kilichopo ndani ya hospitali Teule ya Ifisi kimefungwa kwa muda wa wiki moja kuanzi hapo jana Septemba 30, Mwaka huu, kutokana na madai ya wanafunzi kuwa wamekuwa wakilishwa chakula kibovu.

Wakiongea kwa nyakati tofauti wanafunzi hao kwa sharti la kutotanjwa majina yao wamesema wamekuwa wakilishwa mikate inayotengenezwa kwa ngano na uji wa ulenzi ambao umekuwa na michanga.

Wameongeza kutokana na wao kwenda kusimamia afya hali hiyo ni hatari kwa afya zao hali iliyopelekea kutoingia madarasani na Uongozi wa chuo hicho kuchukua jukumu la kukifunga chuo hicho.

Kwa upande wa mkurugenzi wa maendeleo ya kanisa hilo Mchungaji Marcus Lehner amesema ameyapokea malalamiko yao na kumwagiza makamu wa maendeleo Mchungaji TitoNduka kukaa na uongozi wa wanafunzi hao ili kuondoa tofauti zilizopo.

Ameongeza kuwa walikutana jana majira ya saa saba mchana na kuwaagiza uongozi wa wanafunzi hao kuondoka chuoni mara moja na kurudi baada ya wiki moja na kuwataka kuwataja vinara wa mgomo huo.

Katika harakati za kufunga chuo hicho haraka haraka baadhi ya wanafunzi walifungiwa mabweni kwa muda wa masaa manne, mwandishi wa mtandao huu alibaini kuwakuta wanafunzi wa kike wakiangaika kutoka kwa baadhi ya mabweni na baada ya kupata taarifa hiyo uongozi wa chuo hicho waliagiza wafunguliwe.

Hata hivyo baadhi ya wanafunzi watokao mikoa ya mbali walikutwa wakirandaranda mitaani na wengine kujihifadhi kwa ndugu zao.

CHUO CHA UALIMU MOROVIANI JIJINI MBEYA KIMEAMUA KUBALISHA MUHULA WA MASOMO

Uongozi wa chuo cha Ualimu Moroviani Mbeya kilichopo eneo la Kadege umelazimika kubadilisha muhula wa masomo kwa kuongeza muda wa mapumziko kwa wanafunzi wa chuo hicho ili kutoa nafasi ya ukarabati wa miundombinu ya maji chuoni hapo.

Akiongea na chanzo chetu mkuu wa chuo hicho Eliakimu Mtawa amesema chuo kinakabiliwa na tatizo la mfumo wa kupitisha maji safi na taka hali iliyowapelekea kuongeza muda wa lizikizo kwa wanafunzi wake.

Chuo hicho kilifungwa septemba 26 mwaka huu baada ya kuwepo kwa hatari ya kuibuka kwa magonjwa ya miripuko kutokana na mfumo mbovu wa maji safi na maji taka.

Naye afisa elimu mkoa wa Mbeya Juma Kaponda amesema uamuzi uliofikiwa na uongozi wa chuo hicho umelenga kulinda afya za wanafunzi na sio kama chuo hicho kimefungwa kutoa huduma za kielimu.

NAIBU WAZIRI WA ELIMU PHILP MULLUGO AKABIDHI MISAADA MASHULENI WILAYANI CHUNYA.

Naibu Waziri wa elimu na mbunge wa jimbo la Songwe mkoani Mbeya Philip Mullugo ametoa vitabu 6,000 vya Sekondari na Msingi, Compyuta 40 (Laptop) kwa walimu, Madawati 80 ya kisasa ya katika Sekondari za kata wilayani Chunya.

Akizungumza na mwandishi wetu Naibu Waziri Mullugo amesema kuwa ametoa vifaa hivyo ili kuiwezesha wilaya hiyo kuendelea kielimu.

Aidha ameahidi kutoa shilingi milioni 70 kwa ajili ya kuchimba visima 17 vitakavyosaidia kupunguza tatizo la maji wilayani humo hasa kwa shule za sekondari za kata.

Wakati huohuo amewataka wananchi wilayani humo kuunga mkono mfuko wa Elimu wa jimbo la Songwe unaotarajiwa kuanzishwa hivi karibuni ambayo yeye kama mbunge atatoa shilingi milioni 5.